Монгол Улсын Засгийн газрын тухай хуулийн 24 дүгээр зүйлийн 2 дахь хэсэг, Барилгын тухай хуулийн 33 дугаар зүйлийн 33.1.10, Төсвийн тухай хуулийн 6 дугаар зүйлийн 6.2.5, Захиргааны ерөнхий хуулийн 64 дүгээр зүйлийн 64.1 дэх хэсэг, Сангийн сайдын 2024 оны 3 дугаар сарын 28-ны өдрийн 01/2018 дугаар албан бичиг, Хууль зүй, дотоод хэргийн сайдын 2024 оны 4 дүгээр сарын 30-ны өдрийн 1/2198 дугаар албан бичгээр ирүүлсэн саналыг тус тус үндэслэн ТУШААХ нь:
1.Барилга байгууламжийн төсвийн тооцоо хийхэд хэрэглэгдэх "Барилгын ажилтны тарифт цалингийн жишиг"-ийг хавсралт ёсоор шинэчлэн баталсугай.
2.Батлагдсан тарифт цалингийн жишгийг 2025 оны 01 дүгээр сарын 01-ний өдрөөс мөрдсүгэй.
3.Барилга, хот байгуулалтын сайдын 2019 оны 12 дугаар сарын 30-ны өдрийн 217 дугаар тушаалын 3 дахь заалтыг энэхүү тушаал гарсан өдрөөс хүчингүй болсонд тооцож, 2021 оны 01 дүгээр сарын 01-ний өдрөөс өмнө барилга байгууламжийн зураг төсөл нь магадлалын дүгнэлтээр баталгаажин барилга угсралтын ажлыг гүйцэтгэж эхэлсэн төсөл, арга хэмжээний тухайд 2021 оны 01 дүгээр сарын 01-ний өдрөөс хойш гүйцэтгэсэн ажилд 2019 оны 12 дугаар сарын 30-ны өдрийн 217 дугаар тушаалаар баталсан тарифт цалингийн жишгийг мөрдсүгэй.
4.Барилга, хот байгуулалтын сайдын "Тарифт цалингийн жишиг шинэчлэн батлах тухай" 2019 оны 12 дугаар сарын 30-ны өдрийн 217 дугаар тушаалыг 2025 оны 01 дүгээр сарын 01-ний өдрөөс хүчингүй болсонд тооцсугай.
5.Батлагдсан тарифт цалингийн жишгийг хэвлэх, мэдээлэх ажлыг "Барилгын хөгжлийн төв" ТӨААТҮГ /Ц.Амарсанаа/-т, энэ тушаалын хэрэгжилтэд хяналт тавьж ажиллахыг Барилга, барилгын материалын үйлдвэрлэлийн бодлогын хэрэгжилтийг зохицуулах газар /Д.Гантулга/-т тус тус даалгасугай.
6.Энэ тушаал гарсантай холбогдуулан Барилга, хот байгуулалтын сайдын "Тарифт цалингийн жишиг шинэчлэн батлах тухай" 2024 оны 3 дугаар сарын 29-ний өдрийн 65 дугаар тушаалыг хүчингүй болсонд тооцсугай.